زمن الخوف (5)..

نهى شعبان / الأيام

كنت بسوريا الأسد  اذا بدك تعمل اي مشروع لازم يكون عندك واسطه حتى يمشي مشروعك وتقدر تخلص الاوراق اللازمه لها المشروع حتى لو كان ها المشروع تعليمي .. وقبل ما تحضر وراق الترخيص لها المشروع كان لازم تحضر اول ورقه وهي” الواسطه ” اللي بدها تفتح لك كل الابواب وتمشي لك ترخيصك بسهولة هذا عدا عن فت العملة هون وهون ….وبدل ما يشجعوك كانوا يحطوا لك العصي بالدواليب .. يعني من هالك لمالك لقباض الرواح

وما كان مهم شو منصب هالواسطه المهم انها من طرف الطائفه الكريهه حتى لو كان مجرد “آآآآآآآآآذن ” بيعمل قهوة وشاي بها المديرية او الوزارة مو مشكلة ..و ع قولة المثل: ( شوفير الوزير وزير) يعني حتى لو كان شوفير صينيه بيطلع بايده اكتر مما انت بتقدر تعمل.. واللي كان عايش بسوريا الاسد بيعرف هالشي تماما “..

قصتنا اليوم عن “روان “اللي واسطاتها كلها ما نفعتها وقت قربت على عش الدبابير واخطبوط من العيله الحاكمه وحبت تفتح مدرسة نموذجية للأطفال بعد ما قضت عمرها بالتدريس بمدارس الدولة .. حبت تحط خبرتها واحلامها وطموحها بمدرسة نموذجية تعلم فيها الأطفال بالطرق الحديثه

استاجرت “فيلا ” بمكان كتير حلو وراقي وظبطت كل وراقها وطلع كشف من وزارة التربية ووكانت المواصفات المطلوبة للمدرسة مطابقة !!

تمت الموافقه على افتتاح المدرسه لبينما يتم تجهيزها بالاثاث بيطلع كشف نهائي وبتاخد الموافقه الفعليه ..وبلشت روان بتجهيز المدرسة بأحدث وسائل التربية والتعليم وحطت بها المدرسه اللي فوقها وتحتها ,من ؛جهد ومال ووقت لحتى ينجح مشروع عمرها اللي كانت تحلم فيه . ولما خلص التجهيز طلع كشف نهائي عالمدرسه وتمت الموافقه عا الافتتاح وطار عقلها انه اخيرا” رح يتحقق حلمها.. وعملت افتتاح ضخم عزمت عليه ناس كتير وشخصيات ومسؤولين

والحمد لله بلشت هالمدرسه تستقطب اعجاب الأهالي وبلشوا يسجلوا ولادهم ..والمدرسة يوم عن يوم أحوالها عم تصير أحسن

وبيوم من الإيام.. وهيك بلا احم ولا دستور .. طب غم .. وقفت سيارة شرطة قدام المدرسه وقت انصراف الأطفال ونزل من هالسياره شرطتنا الموقره مدججين بالسلاح وانتشروا قدام باب هالمدرسه و رجعوا الأطفال ع المدرسه.. الاطفال لما شافوا الشرطة ,ارتعبوا وصاروا يبكوا ويصرخوا ..

هون روان طلعت مذعورة وسألت عن سبب زياره الشرطه بها الطريقه وليش حاملين سلاح كانه جايين يقبضوا على خلية ارهابيه؟؟

تفاجات روان انه الشرطه معها أمر باغلاق المدرسه وختمها بالشمع الأحمر والسبب انها فاتحه من دون ترخيص

وانه المدرسه غير مطابقه للشروط المطلوبه وبعد اخد وصد بينها وبين الضابط وبعد ما فرجتوا كل الاوراق وانها نظاميه ما قدرت تخليه يلغي القرار لإنه هو عبد مأمور وما بيطلع بإيده شي ولازم تراجع وزارة التربيه
وطبعا تم اغلاق المدرسه بالشمع الاحمر وما قدرت حتى تاخد وراقها واغراضها الشخصيه

وتاني يوم نزلت لتقابل ” وزير التربيه” وبعد جهد جهيد حتى قدرت تقابله خبرها سبب اغلاق المدرسه بانه مو مسموح لها تفتح مدرسة بها المنطقه لإنه هي المنطقه مخصصه لفئة معينه من المجتمع وخبرته انه هي معها كل الأرواق الرسميه وكله نظامي

الوزير ما اعترف عالاوراق اللي معها وكانت كلها صور عن الأوراق النظاميه وطلب منها النسخ الأصليه

ولما راحت عالمديرية لتجيب النسخ الاصليه اكتشفت انه ملفها مختفي ومو موجود فيه اي نسخة عن  الموافقه .. اي.. ليش مستغربين !!!
مو موجوده . في ايد خفيه سحبت كل الاوراق النظاميه من ملفها

وحاولت روان بشتى الطرق تلغي اغلاق المدرسه ما قدرت, والطلاب معظمهم ضل بالبيت وهالشي اساء الها قدام الاهالي واعتبروها انها غلطانه وصدقوا كذبه الاغلاق .. واللي صدقها وتعاطف معها… للاسف ما قدر يعمل لها شي غير انه يستنى عليها وقت لترد له القسط اللي دفعه

وفورا راحت تدور على واسطه تقدر تساعدها بها الموضوع ووكلت محامي ومو اي محامي بيقبل يستلم هيك قضيه لانه طلع سبب اغلاق المدرسه !!!

انها فاتحتها بنفس المنطقه اللي فيها مدرسة ل “بشرى الاسد ” وانها صارت تضارب عليها وتسرق لها الطلاب ..

تصوروا هالشي !!! تصوروا السبب !! شو سخيف

بشرى الأسد اللي بتمتلك المليارات !!! تضايقت من افتتاح مدرسة قريبة منها

وانه هالمناطق حكر عليهم بس.. وممنوع اي شخص يفتح مشروع حدهن … شو هالجرأة !!

المهم روان ما خلت واسطه وقدرت توصل بإ صرارها لمدير مكتب”ماهر الأسد “.. ولعلي مملوك .. وكلهم وعدوها خير

بس ما حدا ساعدها وكلها كانت وعود كاذبه .. حتى الوزير.. كان بيعرف انه روان انظلمت بس كان جبان وكان مجرد خادم لها العائله الكريهة ودنب الهن .. وما بيطلع بايده شي قدام جبروت وطغيان العيله الحاكمه والحاشيه الوسخه اللي كانت حواليهن تستولي عالأخضر واليابس وتشارك حتى بلقمة عيشك

وراحت المدرسه على روان وراح كل شقى عمرها فيها

قصة روان عبارة عن معاناه استمرت 3 سنين وهي عم تحاول تسترجع مدرستها , وحلم حياتها .. واذا بدي احكي لكم ياها بالتفصيل بدها مجلدات لتخلص .. بس الذكي !! بيعرف يقرا بين السطور شو يعني تفكر !!! وانت عايش بمزرعة آل الاسد

بلشت الثورة وطلعت روان من البلد مع اطفالها وهي ما بتملك شيء الا رحمة ربنا .. وصارت لاجئة متلها متل ملايين السوريين

هيك كان نظام الأسد بسورية مزرعه صغيرة بعاملوا فيها الناس ع أساس حيوانات ويا ويله  ويا ظلام ليله اللي بحاول يفكر بتطوير البلد الا اللي بكون ضمن نطاق عيلتهم .. وعبد عندن .. او يكون الهن النصيب الأكبر من اي مشروع ..

انت التهي بأكلك وشربك !!! .. والتطوير والتحديث كان عليهم بس .. عقلك حطه ع جنب مو محتاجينه .. ممنوع تفكر وتبتكر .. انت بالنهاية حيوان وما الك اي حقوق .. ويمكن الحيوان كان اله قيمة عندهم اكتر من الانسان

عرفتوا ليش قمنا بثورة ؟؟ ..

قد يعجبك ايضا
تعليقات
جاري التحميل