هل ضاع الحلم؟ -حنون دوما

كنت بدي اكتب من كم يوم ووقفت وكنت بدي احكي وسكتت من وقت ما اجتمعت باشخاص من الغوطة وحكولي شو صاير، مع أني ع تواصل يومي مع الداخل وما بيمرق يوم إلا ما احكي مع تنين او 3 اشخاص من الغوطة بس كنت عم كذب حالي
وقت سافرت وكان سفري ب 2013 يعني مو من اول الثورة (يعني شفت وعشت وشاركت بكتير اشياء ) كنت قول مستحيل دم الشهيد ينتسى، مستحيل دم الشهيد ينباع
مستحيل المعتقلات والمعتقلين ما حدا يفكر فيهم غير اهلهم بس طلع ما في شي مستحيل
وقت كنت عم اسمع، ووقت عم أقرأ آخر الاخبار يلي عم نسمعها عن سيطرة النظام ع كتير اماكن عن راحته بالتنقل ومتابعة الحياة اليومية
كنت عم كذب حالي وقول مستحيل، مو معقول هالقد في عنا خونة، هالقد عنا عالم بتنشرى بالاموال،
كنت لسا عم كذب حالي وقول جد ، معقول الحلم ضاع
بس هو ضاع من يوم ما طلع فينا قائد ترأس وصار الكرسي اهم من العالم ومن دماء الشهداء ومن شرف الحرائر
ضاع من يوم ما صار في سجون بمنطقة محررة تساوي عدد سجون النظام
ضاع من يوم ما التعذيب في سجون المناطق المحررة صار بطريقة النظام
ضاع من يوم الاخ والصديق والجار عم يسجل كل كلمة اخوه بيقولها وبيفضحو عالفيس وبيقلو شوف كمشتك متلبس وانا افهم منك انا سجلتلك بس انت كنت غبي (لأنو عند اخلاق المسلم وما رضيت تسجلي)
ضاع من يوم ما تم معرفة سبب الغلاء بالمناطق المحاصرة وتم السكوت عنه
ضاع من يوم ما تم تقسيم السرقات والتجارة بيت الكتائب المتواجدة في المناطق المحررة
ضاع من يوم صار في كتائب للاغتيال ومعروف مين عم يغتال وانكشف وما في حدا بيقدر يحكي
ضاع من يوم الكبير، القائد، الشيخ صار يكذب ويغلط قبل الصغير ولكن ذنبه مغفور وما في حدا يحكي لانو في سجون
ضاع من يوم السني اصبح يقاتل السني وتم نسيان من يريد ازالتنا عن الوجود
ضاع من يوم نسينا أن كل شي زائل في وقت من الاوقات (الاسد، الائتلاف بكامل اطيافه، القادة ، المشايخ، المال والكرسي)
كل شي ضاع بس التاريخ عم يتسجل والكل مذكور بعمله في التاريخ: البطل والكاذب والخائن

اذا كنت تعتقد أن المقال يحوي معلومات خاطئة أو لديك تفاصيل إضافية أرسل تصحيحًا

اترك رد

لن يتم نشر عنوان بريدك الإلكتروني.