عيوني فداك يا سوريه -نهى شعبان

قصتي حقيقيه ومانها من الخيال , وبدكم تتحملوني شوي وبتمنى من الكل يقراها
اسمي عدنان ….سوري…. من أصول شركسيه ,و معتقل سابق ,ومصاب ,
سبب اعتقالي اني كنت ضد الظلم اللي عم يتعرضوا له اهلي وناسي وشعبي

قررت اللجوء للأردن بعد الافراج عني وتعرضي للاصابه والتعذيب بالسجون الاسديه
وصلت عالاردن الشقيق بتاريخ 28/3/2012 تعالجت ,واكرمني الله بالشفاء, ومن صلب ألمي قررت اشتغل بالعمل الاغاثي الطوعي ونظرا” للي شفته من ظلم لأهلي بسوريه قررت اني ساعدهم باي طريقه بقدر عليها هون ببلد اللجوء
ضليت سنتين اشتغل على نصرة المظلوم ,وحاول ارسم ابتسامه على وجه يتيم , ابن شهيد , رجل ختيار , زوجة معتقل
وهيك !!!!! كونت انا ومجموعه من رفقاتي فريق صغير وكنا , ايد وحده, وقلب واحد, والله شاهد على كلامي ,وكان العمل مع أهلي السوريين المظلومين عمل كتير ممتع وكنت حس فيه بسعاده لا توصف ,رغم كل التعب الملون بالألم ,كنا مبسوطين
اشتغلت مع اكثر من جهة تدعي انها رفيعة المستوى, ودون ذكر أسماء الان اعذروني بس رح يجي يوم واذكرها,وكنت والحمد لله عينا ساهرة على حاجات الناس وساهرا على راحتهم ,وتقديم المساعدة لهم
اللي صار معي ……..
انه من حوالي شي اسبوع تعرضت عيني لضغط دم مفاجىء ونزلت المي الزرقا لعيني بنسبه كبيره ,وهالشي أدى لحجب الرؤيه عن عيني بشكل جزئي
وكان لازمني عنايه مركزه ,وعمل جراحي,
وبسرعه قررت الذهاب الى المراكز الصحيه والمشافي اللي بتعالج السوريين وطابلين الدنيا بالخدمات اللي عم يقدموها للسوريين وعم ياخدوا تبرعات ومبالغ الله اعلم قديش على اساسها
بداية كانت جولتي الصباحية على النحو التالي زرت في الصباح اول”مشفى الطلياني “فاعتذروا مني لعدم وجود موعد مسبق , اكملت باتجاه “مشفى عاقلة “,التي ترعى للاسف الشؤون الطبية للاجئين السوريين اعتذروا مني كمان لعدم وجود تغطية مالية
اكملت باتجاه “مشفى البشير الاردني الحكومي “ههه ,,,,واعتذرو بسبب ان ورقة اللجوء التي بحوزتي منتهية الصلاحية وموعد تجديدها للشهر الرابع
ماعلينا رجعت عالبيت وانا مضايق كتير, ومكتئب,وصرت قول بيني وبين حالي مليح اللي ماني مريض قلب او اسعفوني بحاله حرجه كان اسمي صار هلق المرحوم فلان الفلاني

ولك آآآآآآآآآآآآآآآآآآآآآآآآآه و آآآآآآآاخ اخ اخ
ليش هيك العالم كلو عم يلعب فينا وأغلبهم منا وفينا ,ليش؟ لك ليش ؟؟؟ حدا يجاوبني يا عالم منشان الله ليش؟؟ ليش ؟؟؟
والله يا اخواني السوري بيرفع الرااااااااس لانه صاحب قضية عادلة , والتاريخ رح يسجل هالكلام صدقوني !!!! منشان الله صدقوني
المهم بالنهايه ما لقيت حدا يساعدني ويوقف حدي غير رفقاتي واصدقائي اللي حالهم اضرب من حالي , يعني ما انحلت المشكله, ويمكن صير أعمى….. الكلام كتير واذا بدي اكتب ما بيخلص الحكي ,والألم والوجع كله واحد , وعيني هي مو مشكله ,,,,فدى لسوريا كرمالك يا سوريه ضلت عيني على حالها هلق زرقا وبعد كم يوم رح تصير كلها الرؤيا سودا
حبيت احكي لكم معاناتي البسيطه واللي هي جزء صغير من اللي شفته ,والفساد والسرقات باسمنا ,وكرمال عيونك يا سوري
اللي توصلتله بعد هالكم جوله لعيني !!!!
يبدو انه العالم كله بالنهايه بدو يااااانا نصير عميااااااان !!!!!!! يتبع

اترك رد

لن يتم نشر عنوان بريدك الإلكتروني.