عن جد مصدقين انو انتو مش لاجئين متلكن متل السوريين

 بقلم: رشا أبو ذكي –

يعني إلي بيسمع هاللبنانيين كيف نازلين عنصرية ضد السوريين بيقول انو اللاجئين سرقوا الجنة من تحت إجريكن.
هلق عن جد مصدقين جبران باسيل وقت يقول انو اللاجئين أخدو منكن المي والكهربا مش مشاريعو الفاشلة هوي واللي قبلو والفساد اللي ناتش الأخضر واليابس؟
عن جد مفكرين انو اللاجئين أخدوا الوظائف منكن مش هالنظام الاقتصادي التيرسو بكل تفاصيل تفاصيلو؟

 
عن جد مفكرين إنو لولا اللاجئين كان في أمن أكتر بلبنان، ويوم ايه يوم لأ بيموتوا الناس برصاص طايش؟
عن جد خايفين على الخدمات العامة ومش مفروض ذاكرة السمكة تكون نستكن انو من فترة قليلة مات شب لأن مستشفى رفضت تستقبلو؟
عن جد مرعوبين على مناطقكن المليانة زبالة بقرار ومش بالصدفة؟

 
عن جد خايفين من “الغريب” وانتو أغرب شعب بالكرة الأرضية، بيعبد جلاده وبيسميه “قائد”؟
عن جد انتو بتحبو لبنان وخايفين عليه وبنفس الوقت مخليين هيك سياسيين بالسلطة، وبتفدوهن “بالروح وبالدم”؟
عن جد مصدقين انو انتو مش لاجئين متلكن متل السوريين ببلد ملك كم سفاح وكم سراق بتعيطولهن “زعما”؟

 

 

المصدر: جنوبية – اخبار الجنوب لبنان

اترك رد

لن يتم نشر عنوان بريدك الإلكتروني.