شامسان بدها تغير صورة البروفايل

بقلم: ديمة محمود

بارادا: دخيل عينك شامسان وينك تأخرتي بالقهوة، نطف قلبي! ماسكتيلي هالموبايل وماعم ينزل من إيدك.

شامسان: يوه حبيبي! إنت كمان مو مقصر من صبح رب العالمين بتفرك عيونك وهن لسا مافتحوا بتصير بتدعس ع زراير الموبايل وبتفتح شي ع فيس شي ع وتس ولاين وفيبر وتنجو وايش بيعرفني..

بارادا: يللا يللا قومي بدنا نشرب قهوتنا بعدين بنحكي

شامسان : انه قبل ما أعمل القهوة ورجيني كيف غير صورة بروفايلي لعلم فرنسا، حاولت وما كنت أعرف!
أم لطفي وزكية وأم عبد الحميد وصبيحة وزينة ورولا وسمر كلن غيروا للعلم، بدي ساوي متلن أتضامن مع شقفة هالناس البريئين اللي قتلوهم المجرمين الدواعش الله يهدهم إن شالله !

بارادا: قلتيلي !! بقا حاطة راسك بهالموبايل تلات ساعات بدك تغيري صورة البروفايل ..
انضربتي عراسك حبيبتي ، كل ماحدا غير تيابه بدك تعملي متلو ! منيح إنا صورة بروفايل مو غراض بدا مصاري وشرا من السوق !

شامسان : وشو فيها حبيبي ، حركات وهيك ، وبعدين عن جد والله اتقطع قلبي عليهن هالناس الأبرياء. ووويعني .. متل ما هالناس عاملة .

بارادا: شامسان فيقي يا مخلوقة هلء هدول الي عملوا تفجيرات فرنسا إرهابيين مجرمين الله لا يعطيهم عافية قتلوا أبرياء وسلميين مالهم ذنب بشي. لا وفوقها رح ينكبونا نكب ويقلبوا العالم كله ضدنا ويسببوا صعوبات للمهاجرين الموجودين ووللي رح يقدموا لجوء.. مزبوط حبيبتي .
بس تعي لقلك كمان مو بس هيك القصة ، هلء من وين اجت قصة تغيير البروفايل لعلم فرنسا شامسانو!

شامسان : الله يخليلنا حبيبنا اللزم ابو الفهامة والترفيه كله ، مارك شبك !

بارادا: قلتيلي مارك ! وهلء مارك يا شامسان مافطن للتضامن والتعاطف والحنان والإنسانية إلا وقت ما الضحايا كانوا فرنسيين!
ليش برأيك وين كان مارك وقت السوريين الأبرياء المدنيين خمس سنين طحنهم الأسد الله لايعطي عافية ويخلصنا منه هو وداعش وروسيا وإيران والأشكال والألوان . جوا وبرا السوريين تشنططوا قتلى وجرحى ومعوقين ومشردين بالمخيمات وبطريق اللجوء وناس بتموت بالبحر

وينوا عمك مارك والفلسطينيين من شهرين ع مواجهات من الاسرائيليين واقتحامات واعتقال وقتل في القدس ونابلس وكل مدن وقرى الضفة ، لسا امبارح فايتين ع المشفى بالخليل وعاملين مجزرة بقلب المشفى وغيرو وغيراتو قصص بتشيب الراس

وين كان مارك وفي كتير في أماكن بكل العالم اضهاد واعتقال واختفاء وبصب فيها الدم بالمجان من تنظيمات وحكومات خيرات الله شو بدي عد لعد! بدك عد كمان وين وللا وين

شامسان: لا الله يخليك. قلبي ما عاد يتحمل عالم كله قتل ودم وظلم ومافي رحمة ولا عدل.

بارادا: لك من عشر أيام راحوا أبرياء بطيارة سينا اللي وقعت، ومبارح لسا صايرة تفجيرات لبنان ومن كم يوم حرق مخيمات اللاجئين بالسويد وامبارح حرق مخيمات اللاجئين بفرنسا، فهميني مين سائل بمين ؟
أنا بفهم منيح أنه الناس المتواجدين بأوروبا وخصوصا المهاجرين ممكن يكون مهم الهم يحطوا صورة العلم الفرنسي ليكونوا بعيدين عن الشبهه وليوصلوا رساله لأصدقاءهم الغربيين، لكن الموضوع بالنسبة لأي حدا ماعندو أصدقاء أوروبيين وبالذات مو متواجد بأوروبا بالحقيقة هو انتقائية وتقليد وغير منصف خصوصاً نحنا بوسط هاالدمار اللي بنعيشو ومآسينا الكبيرة الي مشترك فيها الكل وعم يتفرجوا عليها ومكيفين ويترزقوا كمان ع ضهرنا.

أم الشموس وين رحتي!
دخيل عينك ركزيلي شوي شايفك نعستي

شامسان: مركزة مركزة حبيب الروح كمل بسرعه بدي روح لحق القهوة وجهز حجرين بسرعه احكي

بارادا: شامسان مارك أفندي عم يشتغل علينا والقصة مدروسة ومو عشوائية، يعني لا مؤامرة ولا بطيخ!
نازل يحطلنا عالبرامج اسمك وكسمك وأصدقاءك وألوانك والبلد الي تعيش فيه وبتشبه مين ومين بيحبك وتغيير صورتك لما بعرف شو .
يا حلوة بشكل أو آخر هاي مو تسليه بس الك ولرفقاتك الطيبيبن.
سذاجتنا نحن العرب وسطحيتنا عم تندرس وتطفو تفاصيلنا وسماتنا لفوق ع السطح.
ومو بس هيك، القطيع الي فينا عم يتورم ويطل برأسه بس بتعرفي من وين ؟ هههههههههه

شامسان: دخيل هالضحكة ، من وين قلي حبيب

بارادا: من السماء نازل راسه للقطيع الله وكيلك مع خيرات الله الكتيرة

شامسان: حبيبي بس مع هيك بدك تغيرلي صورة البروفايل لعلم فرنسا

بارادا: إي مو على عيني ! شو وراي بغيرو وبغير صورة بروفايلي كمان! خلينا نتدلل شوي !
دخيل عينك شموسة بدنا نصحصح ونطلع من هالسيرة.
روحي جيبيلنا هالارجيلة وبلاها القهوة هاتيلنا كاسين عرق وتعي قوااام ، يضرب مارك وأبوه كمان!!!

اذا كنت تعتقد أن المقال يحوي معلومات خاطئة أو لديك تفاصيل إضافية أرسل تصحيحًا

اترك رد

لن يتم نشر عنوان بريدك الإلكتروني.