زمن الخوف (4)..

نهى شعبان / الأيام

ضاع الشحن ؟؟

في عام 2006 سافرت عالامارات لمدة شهر.. منه شغل.. ومنه سياحة و شوبينغ على قولة ولاد المسؤولين ..

ولما وخلص الشهر قررت ارجع عالبلد .. ولاني بفتره هالشهر عملت شوبينغ كتير.. وكلنا بيعرف شو حلو الشوبينغ بالامارات ( متعة التسوق ) قلت لحالي:

كيف بدي نزٍل هالاغراض؟؟؟ معي وزن كتير… وبالطياره مو مسموح اكتر من عشرين كيلو فقررت اشحنهم جوا”

وبلا طول سيرة …رحت على مطار الشحن قبل سفري بكم يوم وبعتت الحقائب كلها .. وهيك بنزل فاضيه وما معي غير حقيبه الايد ( الهاند باج). وبلا هالشنططه بالمطار وانتظار حقيبتي

وحجزت انا بعد كم يوم ورجعت على دمشق .. ووصلت عالمطار.. وكلكم بيعرف شو يعني مطار دمشق!! و ضليت شي ساعه واقفه عم انتظر ليجي دوري لانه على حظي وقت وصلت طيارتي كان في شي 3 او 4 طيارات وصلوا بنفس الوقت والمطار عجئه كتير

المهم وصل دوري اخيرا” وكان ع شباك الكاونتر ضابط وحدُه صبية ..و من لبسها مبينه انها بتشتغل بالمطار.. وخود على طق حنك وضحك هو وياها..

والناس عم تنتظر.. وبعدين اجى دوري..مديت ايدي بالجواز لاعطيه ياه

قال لي: انتظري شوي

انتظرت هيك شي ربع ساعه حتى حضرة جنابه خلص طق حنك

عطيته جواز سفري اطلع فيه وما بعرف شو عمل ؟؟ المهم رجع لي ياه اخدت هالجواز وطلعت فرحانه انه ما رح انتظر حقائبي رح روح دغري استلمهم من الشحن ( هيك قال لي الموظف الهندي بمطار الشحن الجوي بالامارات ) . وعملت متل ما قال لي.. تفاجأت لما الموظف المسؤول قال لي: ارجعي بعد كم يوم لسى ما وصلت حقائبك

حملت حالي ورجعت عالبيت خالية اليدين.. الا اغراض هيك سيفونيير يعني شي بسيط كان( بالهاند باج )وكل ما حدا سألني من العيله وين الهدايا ؟ كنت قول له: بالشحن .. والكل عم ينتظرالهدايا وعم ينتظر هالشحن ليوصل

وضليت على هالحاله شي اسبوع سري مري على هالمطار.. بعدين قلتله للموظف اعطيني الرقم احسن ما اتعذب كل يوم , وانا بتصل وبس يوصلوا بجي باخدهن

طبعا حطيت أجار طريق بها الأسبوع من… والى ..المطار ما فتح ورزق

وصرت كل يوم اتصل .. مره يردوا ..وعشرات المرات ما يردوا .. وهيك لحتى مرق شهر قلت لحالي: يا بنت ما بدها روحي انت هالمره

والله اتصلت باخي المحامي واجى اخدني وطلعنا سوااا

وصلنا عالمطار ورحنا لعند الموظف المسؤول وعطيته الوصل اطَلع بالوصل وقال لي :هاتي جوازك عطيته الجواز . قام بحلق عيونه بالجواز وقال لي وين صاحبة الجواز ؟؟ قلتله: ليكني انا صاحبة هالجواز قال: لاااا مستحيل صاحبة هالوصل لسى ما رجعت وما دخلت سوريا بعدها بالامارات .. ضحكت وقلتله : شو عم تمزح معي ؟؟؟ ليكني قدامك بشحمي ولحمي انا صاحبة الوصل..!! وهي الجواز والي شهر بالبلد
قالي :اتفضلي معي شوي .. مستحيل في شي غلط .. انا هون اصفريت واخضريت وخفت ..

العمى شو صار؟؟ .. والله ما عملت شي

المهم اخدوني على مكتب التحقيق بالمطار وصاروا يحققوا معي من وقت ولدتني امي للحظه وجودي قدامهم .. يعني ما كنت اعرف شو دخل هاد بهاد ؟؟ وبعد ما اتاكدوا انه انا بشحمي ولحمي صاحبة الوصل والجواز قالوا لي والله بدك تروحي ع مكتبنا الرئيسي بالشام وتقدمي طلب.. وتصلحي الغلط اللي بالجواز .. قلتله :وشو الغلط؟؟

قال انتي ما دخلت البلد لسى جوازك مو مختوم ختم دخول … ااااااها

المهم نزلت انا واخي وما بنسى هاليوم بحياتي ورحت عالمكتب الرئيسي بس قلبي مليان منهم

وقابلنا الضابط هنيك وصاروا يناولوا هالجواز لبعضهم ..تقول عم يتباحثوا بقضية الشرق الاوسط

وسالني الموظف انت متاكده انك مريتي عالشباك وختمتي الجواز ؟؟ قلتله يعني اكيد مريت لكان لابسة طاقية الاخفاء.. ؟؟؟

استغرب وسالني طيب ليش الجواز مو مختوم ؟؟ قلتله شو بعرفني ليش مو مختوم عم تسالني الي ؟

المفروض تسال الموظف اللي كنتوا حاطينه .. قال لي بتتذكري وجهه للموظف يعني اذا شفتيه بتعرفيه ؟؟ .. قلتله اي اكيد بتذكر وجهه وفعلا كنت متذكره وجهه لانه كتير تجاكرت منه وقتها ولفت انتباه الكل هو والموظفه اللي معه

هون انا ما عدت قدرت اتحمل وبلشت فيهم رشا” ودراكا”وقلتلون: لك اذا دبانه بتدخل عالبلد بتعرفوا فيها .. فكيف انا بني آدمه وليكني قدامك ودخلت عالبلد؟؟ ومو مسجل عندكم هالشي؟؟ معناها اي جاسوس بيقدر يدخل عالبلد طالما عندكم هيك موظفين غير مسؤولين وعم يقبضوا راتب وهنا مقضيينها تسلايه وطق حنك

هههه وقت قلتله (كلمة جاسوس ,ودبانة )تكركب وصار بده يلفلف الموضوع ويخلص مني بأسرع وقت وبلش يعتذر مني

هون !! انا طلعت عليه بالعالي وقلتله والله لاشتكي عليكم واشتكي على هالموظف والله لخبر الاعلام بقصتي وافضحكم وبلشت تهديدات

وهو يقول لي حقك علينا نحنا منعتذر وهالموظف رح يتعاقب ..

واخي كمان ما قصر فيهم وصار يفهمهم قانونيا” شو بيترتب على هالموضوع اجراءات

هي عملة مو سهلة اللي عملوها وبتخص الامن الوطني والقومي والعالمي وممكن يكون فيها قص رووس .. وشوي تانيه رح يبوسوا رجلينا حتى نسكر عالموضوع وننساه
وانا قول له هلق غراضي بكونوا راحوا صارلهم اكتر من شهر عندكم

شو هالاستهتار؟؟

ما بصير… انا هلق بدي حقي

اكيد مستغربين انه قدرنا نحكي معهم هيك مووووو؟؟؟

اي اكيد بدكم تستغربوا… لانه الموضوع كله كان حلم ..

يعني بالله عليكم معقول اقدر احكي مع موظف بالمطار بها الجرأه فكيف بضابط مسؤول عن امن المطار وووين؟؟ بسوريا ؟؟؟ حيث لا قيمة للانسان كنت رحت بخبر كان..

وبحمد ربي انه يوم اللي حلمت هالحلم كانوا المناوبين بفرع مراقبه الاحلام باجازتهم السنويه

المهم يا جماعه ضلت حسرة بقلبي..لاني كنت حابه كفي الحلم واعرف اذا …وصلت غراضي ووزعت الهدايا ع العيلة ولاااااا لاء

اترك رد

لن يتم نشر عنوان بريدك الإلكتروني.