ذكريات _ معمول العيد

خاص بالأيام || نهى شعبان

 خاطرة من دفاتري

قال لها ماما: مابدك تعملي لنا معمول السنه با العيد والله مشتهيه وجاي على بالي ..
نظرت اليه والابتسامه تعلو وجهها الحزين : تكرم عينك يا عمري واحلى معمول الك .
نزلت ام محمد ع السوق واشترت عدة المعمول من سكر وطحين وسميد وجوز وعجوه بس ها المرة اشترت كميات كبيرة على غير عا دتها
ورجعت عا البيت فرحانه لانه ابنها هلق رح ينبسط ولانه صايم  اليوم فلازم تفرحه عا العيد اقل منها قرص ها المعمول؟؟
عزمت الجيران ليساعدوها وقالت لها جارتها تعلمت وصفه جديده للمعمول عم يحطوا له عصير أحمر … شو رأيك نجربها ؟

ام محمد : ليش لاء مو غلط
وبدأ العمل.. وأم محمد دموعها نازله عا العجنه بدل المي قال با الدمع أطيب هيك سمعت يمكن ….؟؟؟ وها السنه ام محمد بدها توزع على كل الجيران وبدها تطعمي كل أهل الحاره
خلص المعمول مع كلمة الله اكبر وصار وقت الافطار بس ما رضت تاكل منها لحتى ابنها وزوجها ياكلوا با الأول، وتوزع معمول  ع كل اهل الحاره  وبلشت تكبيرات العيد … ايه انشالله كل عام وانتوا بخير يا نايمين … شتقتلكن كتير .. ليش تركتوني لحالي …اخدت المعمول وراحت عا التربه وكانت عاملة “لمحمد” صينيه اله لحاله مشكله من كل الانواع الي بيحبها وهي فرحانه وعم تنادي له كول حبيبي.. كول يا عمري .. هي عملت لك المعمول الي بتحبه كول انت وابوك …
وكانت جايبه معها اكتر من صينيه طعمتها للكل با المقبرة وصارت تزغرد وتصرخ كل عام وانتوا بخير …كل عام وانتوا بخير ….
هدا اكتر عيد بمر علي وانا حزينة لانه كل سنه عم اخسر ناس بحبها ناس هاجرت وناس ماتت وناس بعاد عن عيني بس محفورين بقلبي ..
وكل عيد عم يمر عم يكون مليان غصات ووجع وألم على كل السوريين
ورغم هيك بحب قول لكم :كل عام وانتوا بخير وانشاء الله ابو محمد وابنه بياكلوا معمولأاطيب من هيك لانه معمول  ومجبول بخلطه ربانيه ما حدا بيقدر يعرف وصفتها غير الخالق وانتوا الي ما بتحبوا المعمول تصطفلوا خليكم عم تاكلوا مدلوقه با الجبن والقشطه بس بحب نبهكم لا تكتروا منها لانه لمعلوماتكم …

بيلبطكم العيد

اترك رد

لن يتم نشر عنوان بريدك الإلكتروني.