خبز وملح وأصدقاء للأبد..!!؟؟

 

خاص بالأيام|| نهى شعبان :_

اللي ما عنده اصدقاء ما بيعرف شو يعني كلمة صداقة
واللي ما عنده شلة رفقات كمان ما رح يعرف شو معناها
ها الكلمة اللي الها معاني كبيرة كتير وما بيعرف معناها الا القليل القليل
رفقات الدرب رفقات مقاعد الدراسة ..رفقات المشاوير.. رفقات بالسلم.. ورفقات بالحرب

قبل الثورة كان عندي خمس رفقات بس…. هدول حصيلة رحلتي بها الدنيا
ترافقنا عالدرب.. من مقاعد الدراسة  عملنا شلة، كل وحدة فينا  كانت بتتميز عن التانية بشي خاص فيها، بس كان بيجمعنا شي واحد هو كلمة عهد قطعناها لبعض” اصدقاء للأبد”
درسنا سوى.. وشاغبنا سوا.. وكتبنا راشيتات سوا.. و حلمنا سوا ..ونجحنا سوا… وبعدين افترقنا لفترة و كل وحدة فينا اختارت طريقها؛ ورجعت الصدف جمعتنا من جديد   اللي تزوجت واللي تطلقت واللي بعدها عم تدور على فارس احلامها.
المهم كل وحدة فينا عرفت زوجها على زوج التانية منشان ما نفترق من جديد.. وصرنا نعمل جمعات كل اسبوع او كل 15 يوم  واحيانا” نعملها زيارات عائلية .. وتكون اللمة ببيت وحدة من هالشلة حتى لو كان مطر، تلج، اوحتى شوب؛ كان هالتوقيت مقدس  عند الشلة كلها 
ومرت الأيام والسنين وكل وحدة فينا صار عندها ولاد وكمان ولادنا صاروا رفقات، ناخدهن سوا عالجنينة كل يوم عطلة يقضوا الاجازة مع بعض، المهم ما افترقنا وضلينا مع بعض ايد وحده ندعم بعض بالسراء والضراء ونشكي همومنا لبعض، وكبروا ولادنا وفي منهن زوجوا ولادهن وصاروا جدات

وبلشت الثورة .. ولما قررت غادر البلد زرتهن وحدة وحدة وودعتهن .. وافترقنا وانقطعت اخبارنا عن بعض، وما عدت اعرف وين صارت اراضيهن
ومين مات منهن ..؟ ومين ضل عايش؟؟ مين وقف مع الثورة؟؟ ومين وقف مع النظام؟؟ حاولت كتير اعرف اخبارهن ما  قدرت.. اللي غيرت رقمها.. واللي سافرت .. واللي الله اعلم شو صارفيها.. بتمنى ارجع التقي فيهن من جديد بعد ما تخلص الحرب 
المهم  بلشت من الصفر بالغربة وصار عندي رفقات جداد رفقات مصير ورفقات ثورة؛ هيك عالاقل انا فكرت..!!
وصاروا هالرفقات هنا ملاذي الوحيد بالغربة، نجتمع مع بعض، ونشتغل مع بعض، ونبكي مع بعض، ونفش قلبنا وهمومنا ونواسي بعض
يمكن الصداقة شي كتير كبير ومو اي شخص بيفهم شو معنى انه يكون لك رفيق بتعتبره مراية الك بيفرح لفرحك وبيزعل لزعلك
او يمكن انا عم بالغ بمفهوم الصداقة شوي .. ويمكن الصداقة هي مجرد فترة من الزمن بتتعرف فيها على ناس وبتحب يضلوا معك طول العمر .. لدرجة انه بتعتبرهن جزء منك وممنوع حدا يقرب عليهن
هيك انا فهمت معنى الصداقة بزمن السلم وبزمن الحرب ما تغيرت نظرتي ابدا” ..
المؤلم انك تصحى وتلاقي كل رفقاتك اللي وقعت معهن عهد صداقة للأبد.. قبل الحرب  وبعد الحرب  رحلوا من دون ما يودعوك ولو حتى بكلمة عن طريق اختراع اسمه تلفون او رسالة صغيرة عن طريق الواتس او الفايبر أو أو أو …الخ.. ونسيوا الخبز والملح .. 
والعهد اللي وقعتوا معهن بعده محفور بقلبك وما عم يقدر يفارقك .. ولا عم تقدر تعبر عن وجعك..  
يا ترى انا غلط؟؟ انتوا شو رايكن ؟

اترك رد

لن يتم نشر عنوان بريدك الإلكتروني.