أحلامنا محققين

خاص للأيام|
بقلم : شام دام
سمعت تلفوني بيعطي رنين من الصبح قبل الشحادين فتحت عين وقلت يافتاح ياكريم واذا بصوت احد اللاجئين ابوعبدو صديق السنين لما كنا مراهقين وكان حلمو يشوف الاوربيين شلون بيسبحوا بالبحر عريانين بيموت كان بالدلافين ووقتها حتى لفظ اسم بلادون من اصعب اللافظين ويقلي بدي روح لاورنبا وكنا عليه من الضحك غشيانين
المهم يامستمعين نزل فيني شمال ويمين وكيفك ياشيخ المغتربين هي وصلنا لعندكم بس والله هلكانين ومن الجو بردانين ومتلجين بدي افهم كيف انتو صامدين ليكون من كتر الحلوين بس ماقلتلي انو في عندكم برد وزمهرير ياسيدي هي حققت الحلم الي كان دايما يزعجك لما تجي مع الزايرن

قلتلوا: انو يا أبو عبدو الغربة مابيعرف طعمها الا المغتربين الي التوبة نحن كنا متلك مو مصدقين لكن الظروف صارت وقلنا ليش الفرصة مفوتين لازم نسرع ولعندك واصلين وحلمنا والله محققين وهل البلد ماعاد فيها الا الانين حتى ذكرياتك تبع جنب الدكاكين هدوها وفيها حاجز للناس مانعين
قال لي : بس وحياتك نحنا الي بقينا صامدين ولاوربا اجينا راكضين والبلم كنا نافخين وعاليونان مبحرين وندعي لربنا انو مانكون غرقاتنين واكل للسمك والدلافين لكن الحمد لله كنا اول الواصلين لليونان والخارطية اخدين وبوشنا لمقدونيا زاحفين باتجاه اوربا مهاجرين

قلتلو: وقف صاير متحسن باللغة متل المتعلمين
قلي : سكوت تزوجت وحدة ابوها شيخ المدرسين وهي مابها شي عايدة التاسع مرتين وطلعت بعدها لانو صرنا مخطوبين ومعها افضل شهادات المتعلمين وبلشت تعلمني لفظ الاوربيين لظبطتلكن بعد ماولدت تاني الصبيين المهم انا قدمت على لم الشمل وهنن ورايي قادمين بس بدي اخد راحتي وشوف الي بزمانو قلك نفسي كون متلك مع المغتربين وهي حققنا الحلم ومالنا نادمين ومستحيل اتنازل عن حلم السنين ولو اخد البلد كلا بوتين نحنا بشان هيك حلفنا يمين انو لاوربا واصلين وشو انتظرنا سنين الي بس والله المعاملة مو متل ماالولنا الهربانين ليكون بدون يخلونا ندوق الصبر متلهون وهنن مخيمين حسينا حالنا بمضارب بني ميركلين معقول خيم ومطر ونحن بردانين ومافي يورو بس اكلين شاربين نايمين مو مشكلة المهم الشقراوات علينا طالين يا اخي بضلو مبتسمين مو متل جماعتنا بضلو مبوزمين ولرغيف السخن مو ضحكانين بس ال مافي النا بيوت وبالخيم ساكنين طيب في أراضي فاضية كتير خلينا للبيوت نحن معمرين تاركين الأراضي والله جماعة مو فهمانين انا بستنى ابني هو من الدارسين مابدنا منيتهون بكره من الصبح بكون من الواقفين وعلى الشغل اول الرايحن
قلتلو: لك شو كل واحد راكض ولكريكو حاملين الشغلة بدها موافقة المسؤلين
قال لي: شو مسؤلين نحنا منعمرلهون احلى بيوت متل بيوتنا وملونينها من احلى فنون الفنانين ويمكن نصير من كبار المقاولين دخلك الجنسية صحيح لناخدها مطولين ؟
قلتلو: ولك يازلمة الأمور مو متل مو فهمانين لبين ما تاخد وراقك بدك سنين وقلتلو ليش تركتو بلادنا ولمين؟ صحيح نحنا طلعنا مغتربين وكنا ننتظر ايمتى الوقت لعندكم راجعين للأسف تركتوها واجيتو واستلموها الخاينين وكل واحد يارب اسالك نفسي وصرتو لاجئين ونازحين ومهجرين وجايين للغرب لحلمكم محققين
قال لي: سكوت لاتحكي اكتر من هيك ماجربت ماجربت الجوع والمي عنك قاطعين والكهربا مقننين مابتجي الا وقت نكون نايمين ومنها مو مستفيدين وشو بدي احكيلك وفش قهر الخايبين راحت شبابنا الي كنا عليهم معتمدين نحنا خلعنا سنانا من الفقر وغدر السنين سامحونا نحن مظلومين لاتفكرو فرحانين
وفجاه صار التلفون يعطي طنين حسيت بظلام ذكرني بوقت كنا مهاجرين وتحت جنح الظلام كنا مسافرين ومابتفرق هربانين بس امانة طفوا الضو قبل ما للباب مسكرين لانو لو اجت الكهربا ونحنا غايبين رح يبان على وجوهنا انا خجلانين

اترك رد

لن يتم نشر عنوان بريدك الإلكتروني.